Vasili: Amerika e pazëvendësueshme për fatet e Shqipërisë

Nën/Kryetari i LSI Petrit Vasili priti në një takim z. Michael Konstantino, zv.Drejtorin për Europën Jug-Lindore në Departamentin e Shtetit.

Në këtë takim Vasili është shprehur se Amerika është e pazëvendësueshme për fatet e Shqipërisë dhe i shprehet mirënjohës Amerikës për mbështetjen në Integrimin Europian të Shqipërisë.

Luan Rama: Po kryhet grusht shteti. Banda e pushtetit synon të kapë Gjykatën Kushtetuese

Zëvendëskryetari i LSI-së Luan Rama shprehet se qëndrimet e PS kundër Gjykatës Kushtetuese dhe marrja e kompetencave të institucioneve të tjera dëshmojnë për tentativën e një grushti shteti.

Analiza e plotë e Luan Ramës:

Shqipëria, prej mungesës së Drejtësisë Kushtetuese, nën aktet e goditjes së shtetit! Të gjithë ata që zgjedhin të studiojnë në fakultetin e drejtësisë, një prej postulateve të para që mësojnë është supremacia e kushtetutës mbi të gjitha ligjet e tjerë. Sipas kësaj logjike dhe mënyrës së arsyetimit që lind prej saj, norma kushtetuese është normë eprore e një sistemi juridik.

Këtë parim, edhe pa qenë me formim juridik, e mësojnë gjatë punës së tyre e më drejtpërdrejtë gjatë praktikës ligjbërëse edhe deputetët. Ose të paktën, mendohet a presupozohet që duhet t’a mësojnë. Sepse, puna ua do që të dinë se çfarë është kushtetuta dhe se si përshkallëzohet në rend zbritës hierarkia e akteve juridike prej kushtetutës tek kodet që janë ligje me shumicë të cilësuar, e prej kodeve, që janë ligje me supremaci mbi ligjet e thjeshtë, të cilat quhen të tillë pasi miratohen me shumicë të thjeshtë, që do të thotë miratohen me një votë më shumë se gjysma e deputetëve pjesmarrës në votim.

Më ndjeni për natyrën didaktike të shpjegimit të mësipërm, por jam i detyruar të bëj edhe shpjegime divulgative, pra të karakterit elementar, për t’iu përshtatur kësisoj edhe nivelit intelektual të një pjese të deputetëve, të cilët jo për fajin e tyre, janë mjerisht nën nivelin mediokër. Por, nëse nuk i bën fajtorë niveli intelektual që kanë,

Injoranca intelektuale nuk i mbron prej të qenit të zvetënuar e zhbërë deri në neveri, kur edhe prej tyre, procesi i ligjbërjes në Kuvendin e Republikës së Shqipërisë, është prej kohësh një veprimtari antikushtetuese. Është veprimtari antikushtetuese, sepse bie ndesh me detyrimin kushtetues që buron prej nenin 64 të kushtetutes, sipas të cilit “Kuvendi përbëhet nga 140 deputetë”. Kuvendi i Republikës së Shqipërisë, prej një viti nuk i ka më 140 deputetë!

Por, është antikushtetuese veprimtaria ligjbërëse e kuvendit edhe prej pamundësisë së ushtrimit të funksioneve nga ana e Gjykatës Kushtetuese, e cila është i vetmi organ që mund të gjykojë aktet e tij. Miratimi i ligjeve në kushtet e mosfunksionimit të Gjykatës Kushtetuese, është dëshmi e qartë se qeveria qëllimisht e ka bllokuar procesin e zëvendësimit të vakancave të krijuara në atë gjykatë, për t’a përdorur këtë kohë pezull jo thjeshtë për të cënuar kushtetutshmërinë apo atë që në jurisprudencë a në të drejtën kushtetuese njihet si Drejtësia Kushtetuese, po për shumë më tepër se kaq; për të “veshur” formalisht me mbrojtje ligjore veprimtarinë e tyre prej keqbërësish, që si një grup i strukturuar kriminal, hap pas hapi po kryen në fakt një grusht shteti!

Po, Kuvendi i Shqipërisë po kryen grusht shteti!

Për të gjithë ata që në mënyrë naive apo prej mosdijes perceptojnë me grusht shteti vetëm rastet kur ushtarakët nxjerrin tanket në rrugë dhe rrëzojnë me dhunë nga pushteti organet e zgjedhura në mënyrë legjitime, më duhet të shpjegoj se ai është vetëm njëri nga rastet e grushtit të shtetit.

Një parantezë: togfjalëshi grusht shteti” vjen nga fraza e frengjishtes coup d’état, që do të thotë goditje në shtet dhe përdoret si term profesional për të karakterizuar çfarë quhet grusht shteti në mbarë botën. Pra vjen nga fjalët frënge coup, që do të thotë goditje e papritur dhe état, që do të thotë shtet.

Sipas këtij përcaktimi, një rast tjetër i “goditjes në shtet” është veprimtaria e Kuvendit të Republikës së Shqipërisë, i cili, me paramendim dhe në mënyrë të organizuar dhe të qëllimtë, përgatit dhe miraton ligje që dukshëm dhe hapur janë në kundërshtim me kushtetutën, me synim goditjen e shtetit dhe marrjen e autoritetin kushtetues apo të pushtetit të organeve të tjera kushtetuese.

Vetëm pak ditë më parë, qeveria duke përdorur (në fakt duhet lexuar: keqpërdorur!) një grup deputetësh prej atyre që e kanë me qef të përdoren, ndërmori nismën për të miratuar një ligj, sipas përcaktimeve të të cilit, anëtarët e Gjykatës Kushtetuese, përpara fillimit të ushtrimit të detyrës nuk duhet të betohen më para Presidentit të Republikës, siç e përcakton kushtetuta, por, duhet të betohen para vetes së tyre duke e kryer betimin me shkrim (injorancë pa kufi!), ose duke e kryer atë edhe para noterit! Qëllimi i një nisme të tillë është i qartë; qeveria do që të kapë Gjykatën Kushtetuese e përmes saj, të mbyllë ciklin e kapjes së të gjithë shtetit, me marrjen edhe e të vetmit institucion legjitim në vend, atij të Presidentit të Republikës. Kryeministri dhe të tjerët pas tij mund të mos e duam Ilir Metën. Kjo është në të drejtën e tyre. Por, nëse nuk e dua Ilir Metën, kjo nuk u jep asnjë të drejtë që për inatin ndaj tij, të shkelin kushtetutën dhe të ndërmarrin hapa ligjorë si kundërvënie ndaj kushtetutës, sepse një praktikë e tillë është grusht shteti!

 

Drejtësia kushtetuese është institucioni që garanton respektimin e hierarkisë së burimeve të së drejtës dhe, me këtë, edhe të supremacisë së normës së kushtetutës, si norma eprore në një sistem juridik. Kjo do të thotë që asnjë ligj, pra asnjë ligj dhe asnjë kod nuk mund të ketë fuqi, për rrjedhojë, nuk mund të zbatohet për aq kohë sa është në kundërshtim me kushtetutën! Kjo nuk është as çështje vullneti dhe as punë qefi.

Është detyrim për të gjithë shtetasit e Republikës së Shqipërisë, prej Presidentit e për gjithë të tjerët. Është detyrim edhe për kryeministrin e qeverinë e tij, është detyrim edhe për frymorën që janë deputetë. Mirëpo, banda e pushtetit, duke vrarë Drejtësinë Kushtetuese me bllokimin e deritashëm të Gjykatës Kushtetuese e me synimin për kapjen e saj, nuk po bën asgjë tjetër; por po hedh hapin e radhës në përpjekjet për të realizuar grushtin e shtetit si objektiv fundor, çfarë do të shënonte goditjen më të rëndë ndaj sistemit politik, shtetit të së drejtës dhe vetë demokracisë! Gjykata kushtetuese është arbitër i pushteteve. Në kushtet e konfliktit mes pushteteve është ajo që ndërhyn dhe jep drejtësi kushtetuese. Këtë të drejtë nuk e ka kuvendi, nuk e ka as qeveria që ndërsen kuvendin të shkelë kushtetutën. Drejtësia Kushtetuese shumë shpejt do të vijë. E bashkë me të, do të vijë edhe drejtësia e munguar, si edukatë më së pari e mandje edhe si forcë e zbatimit të ligjit, përballë të cilës, verbëria e të përdorurit për akte antikushtetuese, nuk do të mund t’i imunizojë as mjeranët që nuk dinë tjetër, përpos të shijojnë kënaqësinë e të vetmes “meritë” që kanë; keqpëdorimin! Kuvendi i Republikës së Shqipërisë duhet të kuptojë sot se në ç’rrugë pa krye po investohet. Nesër do të jetë vonë e nuk do të ketë më asnjë shans t’ja kursejë Shqipërisë kostot e marrëzive të veta!

“375.6 milion euro, borxhe jashtë bilancit”, Spahiu liston problematikat e qeverisë

Ish-deputeti i LSI, Përparim Spahiu me anë të një statusi ka reaguar në lidhje me faktin që Shqipëria është renditur një ndër vendet më të korruptuara.

Sipas Spahiut, e gjitha kjo ndodh për shkak se nuk ka asnjë shpjegim tjetër se ku shkojnë paratë e taksapaguesve.

POSTIMI:

375.6 milion euro, borxhe jashtë bilancit, raporton Ministria e Financave (KLSH për të njëjtën periudhë raporton dyfishin).

Tani, kur:

Nuk ka rritje pagash e pensionesh prej 7 vitesh,
nuk ka investime direkt në infrastrukturë,
nuk ka subvencione për bujqësinë,
kërkon borxh mbi 700 milion euro për ujësjellës,
ndërtimin e shkollave dhe spitaleve e ke dhënë me PPP,
ke nivelin më të lartë të taksave dhe tatimeve në rajon,

patjetër që je më i KORRUPTUARI pasi nuk ka asnjë shpjegim tjetër se ku shkojnë paratë e taksapaguesve.

“78% e shqiptarëve nuk besojnë se qeveria do ulë korrupsionin”, reagon Pojana: Është koha për zgjedhje!

Anëtari i Kryesisë së LSI-së, Klevi Pojana ka reaguar mbi raportin e Sistemit të Monitorimit të Korrupsionit, të kryer nga qendra e Evropës Juglindore për Integritet dhe Zhvillim, i cili nxjerr në pah se 78% e shqiptarëve nuk besojnë se qeveria aktuale do të ulë korrupsionin.

“Klika në qeveri është vetë e korruptuar deri në palcë!” – shkruan Pojana në një postim në rrjetin social Facebook.

Postimi i plotë:

Vrojtimi mbi nivelin e korrupsionit, ‘Sistemi i Monitorimit të Korrupsionit’, për 6 vendet e Ballkanit Perëndimor, i kryer nga qendra e Evropës Juglindore për Integritet dhe Zhvillim, gjeti se në Shqipëri për vitin 2019:

78% e shqiptarëve nuk besojnë se qeveria do të ulë korrupsionin❗️

Kjo, sepse klika në qeveri është vetë e korruptuar deri në palcë!

Besimi ka humbur prej shumë kohësh dhe qytetarët duan NDRYSHIM dhe e duan TANI.

Opozitës i lipset të ngjall shpresë, duke zgjedhur në përfaqësim figurat me integritetin më të lartë.

Është koha për zgjedhje.
/ In Archived Articles, News / By Admin / Comments Off on “78% e shqiptarëve nuk besojnë se qeveria do ulë korrupsionin”, reagon Pojana: Është koha për zgjedhje!

Petrit Vasili: SHBA dhe BE boll më duarlidhur, Rama po shkatërron Reformën në Drejtësi

Nga Petrit Vasili:

SHBA dhe BE boll më duarlidhur, ndërsa Rama shkatërron Reformën në Drejtësi.

Me insistimin e SHBA dhe BE në vitin 2016 pas miratimit të ndryshimeve kushtetuese u miratuan me rrëmbim shtatë ligjet që do të jetësonin reformën në drejtësi.

Shtatë ligje të përgatitur nga Grupi i Eksperteve të nivelit të lartë që do të miratoheshin pa ndryshime në parlament siç u dakordësua nga SHBA dhe BE me Komisionin ad Hoc të Reformës në Drejtësi.

Rama po i zhbën, copëton dhe ndryshon ligjet dhe bashkë me to po asgjëson realisht paketën e shtatë ligjeve të Reformës në Drejtësi.

Duke sulmuar egërsisht:

-ligjin për statusin e Gjyqtarëve dhe Prokurorëve,

-duke i dhënë Inspektorit të Lartë të Drejtësisë pushtet antiligjor,

-Duke miratuar paketën antishpifje

– duke miratuar KÇK

-duke shkatërruar ligjin për Gjykatën Kushtetuese dhe duke hequr edhe Betimin të Presidenti e duke çuar në postën e lagjes,

duke miratuar ligje që dalin edhe mbi Kushtetutën në mënyrë flagrante është qartë, që Edi Rama po rrëmben deri në copën e fundit drejtësinë.

Ligjet e reformës shqepen e qepen përditë sipas hallit të ditës së Edi Ramës.

SHBA dhe BE nuk duhet dhe nuk mund të pranojnë me një situatë të tillë kaq të rrezikshme me drejtësinë.

Ato ishin garantët e reformës në Drejtësi.

SHBA dhe BE janë edhe në Kushtetutën e Shqipërisë për rolin e tyre në Reformën në Drejtësi.

Reforma në Drejtësi është kthyer sot në një copë letër të cilës Edi Rama i shkul nga një copë ditë për ditë sipas hallit të ditës.

SHBA dhe BE kanë detyrë të vënë gishtin në plagë, të shohin të vërtetat në sy.

Duartrokitjet pa fund të tyre janë përdorur nga Rama si alibi për kapjen e drejtësisë.

Shqiptarët janë të zhgënjyer nga ky zbatim i reformës në drejtësi dhe kanë humbur besimin te ajo.

SHBA dhe BE duhet të jenë në krah të shqiptarëve dhe jo të qeverive që vijnë e ikin.

Drejtësia e pakapur dhe që ndëshkon korrupsionin e tmerrshëm dhe kriminalizimin e qeverisë kjo është ajo që shqiptarët presin dhe që SHBA dhe BE jua premtuan atyre kur u miratua Reforma në 21-22 korrik 2016.

Reforma në Drejtësi është në prag të greminës dhe askush nuk mund të mbylle më sytë sepse kjo do të sillte një kaos me pasoja të paparashikueshme.

Ndaj koha për të vepruar është tani.

Propaganda artificiale dhe lavdërimet fiktive plot sheqer në anglisht dhe shqip e kanë helmuar reformën në drejtësi.

Braimllari: KÇK nismë anti-kushtetuese, Rama kërkon të kapë Kushtetuesen për të ligjëruar paligjshmërinë

Sekretari i Përgjithshëm i LSI-së, Endrit Braimllari e ka quajtur paktën anti KÇK si një nisëm anti kushtetuese, e cila po behët në këto momente për të tërhequr vëmendjen nga problemet me të cilat po përballet vendi.

“Paketa Anti-KÇK është një nismë antikushtetuese e cila bëhet në këto momente për të tërhequr vëmendjen nga problemet me të cilat po përballet vendi. LSI vlerëson çdo betejë kundër krimit të organizuar por krimi i organizuar nuk luftohet me propagandë, luftohet me strategji dhe vullnet të qeverisë. Nuk mundet Edi Rama pas 7 vitesh të luftojë krimin e organizuar sepse në këto 7 vite është kryeministri dhe qeveria e tij, që ka fuqizuar krimin e organizuar duke e mbështetur dhe duke i përdorur në fushatë për interesin e tij ashtu siç dolën në përgjimet zyrtare dosja 184 dhe 339.
Përpjekjet e Edi Ramës për të kapur Gjykatën Kushtetuese janë të qarta sepse ai kërkon të ligjërojë paligjshmërinë e tij dhe të qeverisë së tij. Kalimi në Parlament i një ligji i cili kërkon të marrë një kompetencë kushtetuese të institucionit të Presidentit të Republikës mbi betimin e anëtarëve të Gjykatës Kushtetuese tregon qartë që Edi Rama dhe deputetët e tij ilegjitim janë tanimë një grup i strukturuar kriminal që duan të shkatërrojnë reformën në drejtësi duke kapur çdo institucion në këtë vend edhe duke ligjëruar paligjshmërinë etj.”
 – theksoi Braimllari.

/ In Archived Articles, News / By Admin / Comments Off on Braimllari: KÇK nismë anti-kushtetuese, Rama kërkon të kapë Kushtetuesen për të ligjëruar paligjshmërinë

Spahiu: Qeveri pa ide e program. Investimi i vetëm është probaganda

Ish-deputeti i LSI-së Përparim Spahiu ka reaguar me anë të një statusi në Facebook duke thënë se Shqipëria ka një problem të madh, të cilin LSI e ka shprehur dhe në vitet e koalicionit me PS-në që është mungesa e investimeve në ekonomi, kryesisht ato të huaja.

Spahiu shton se kjo qeveri është një qeveri pa asnjë progam dhe ide dhe investimi i vetëm i saj në këto vite është probaganda e saj dhe jo krijimi i kushteve të favorshme për më shumë investime.

Postimi i Sphaiut në Facebook

Prej kohësh kemi ngritur të njëjtin shqetësim, madje edhe kur qeverisnim bashkë, por çdo fjalë e jona ka rënë më vesh të shurdhët.

Standard and Poors paralajmëron krijimin e një klime të favorshme për investime në ekonomi, sidomos ata të huaja, për të dalë nga bataku ku kemi rënë.

Por

E pamundur që një qeveri inekzistente, pa ide, pa program, ku investimi i vetëm direkt i saj është propaganda, të krijojë kushtet e favorshme për më shumë investimeve.

E pamundur që një qeveri e zgjedhur me vota të grabitura nga krimi, të luftojë korrupsionin (renditemi si më të korruptuarit në botë)

E pamundur që të investohet në një vend pa gjykata, pa parlament.

Na takon ne si opozitë të çojmë vendin në zgjedhje, si zgjidhja e vetme e kolapsit pilitik, administrativ, legjislativ.

Askush nuk duhet të presë që një mendje e sëmurë, arkitekti i gjëndjes ku jemi, të çojë vendin në zgjedhje të parakohshme.

2020 duhet të jetë viti i ndryshimit të madh. Çdo ditë vonesë do jetë më shumë varfëri, më shumë emigrantë, më shumë krim e korrupsion, në kurriz të të gjithëve ne.

Nora Malaj: Pesha e gruas shqiptare dhe viti ekonomik i vështirë 2020 !

Nga Nora Malaj

Pesha e gruas shqiptare dhe viti ekonomik i vështirë 2020 !
Hyri një vit i vështirë për ekonominë shqiptare! Kështu thonë , për fatin tonë të trishtë ,të ekonomisë shqiptare , të gjithë analistet e ekonomisë!
“Me mbarimin e projekteve të mëdha, pasojave të tërmetit, sidomos në turizëm, emigrimin që po godet fuqinë punëtore e produktivitetin e kompanive, krizën e tej zgjatur politike, ambientin e rënduar për të bërë biznes, që po pengon investimet e huaja, eficiencën e ulët përballë konkurrencës së lartë europiane e rajonale, 2020-a pritet të jetë i vështirë për ekonominë shqiptare. Pjesa më e madhe e sektorëve, me përjashtim të industrisë automotive, janë pesimistë. Institucionet ndërkombëtare e vënë theksin te qeverisja e mirë dhe kryerja e reformave si një parakusht për përshpejtimin e rritjes në afatin e mesëm e të gjatë”. Kjo është prognoza e analizave ekonomike e ndërkohe zonjat e shtëpisë duhet të përgatiten se pesha e barrës së tyre në punët e shtëpisë do të jetë tejet më e madhe. E thënë ndryshe , kriza ekonomike ka trokitur ne familjet tona!
Duket si tringëllimë, po në fakt është kembana e alarmit , që do të ndihet në tryezat tuaja , te dashura zonjat e shtëpisë. E teksa punët e shtëpisë do të shtohen, çmimi për çdo produkt, duke filluar nga shporta e ushqimeve bazë është rritur me masën 30 për qind .Produktet e detergjenteve për të mbajtur pastër shtëpinë ( ndonëse këto punë për të gjitha gratë amvisa ose jo , janë punë të papaguara) rritet në masën 40 për qind ( fut këtu edhe ujin e korrentin , çmimet e të cilave janë dyfishuar ) dhe rroga që dikur ishte e mjaftueshme për të përballuar deri diku koston e jetesës , rreth 90 për qind do të shkojë vetëm për konsumin ushqimor , pa llogaritur shpenzimet e tjera, kur ke fëmijë të vegjël , në shkollë apo të moshuar të sëmurë , që duan shërbime të dedikuara dhe medikamente të kushtueshme dhe të shtrira në kohë. E gjithë kjo barrë dhe krizë financiare do të bjerë mbi gruan , e cila duhet të menaxhojë ketë situatë që quhet “Krizë ekonomike”.
“Ekonomia europiane pritet të rimëkëmbet shumë ngadalë në 2020-n, sipas parashikimeve të Komisionit Europian, me 1.2%, nga 1.1% vitin e mëparshëm.” Të dhënat e Monitorit tregojnë se situata ekonomike është shumë e rëndë dhe të parët do ta ndjejnë familjet shqiptare, të cilët do të punojnë për mbijetesë. Ato që sot kanë mbetur pa shtëpi nga goditjet e tërmeti, ato që kanë një nivel nën mesatare dhe që janë familje të varfra, ku shteti nuk i garanton statusin e ndihmës ekonomike. Po krizën me të madhe do ta ndjejë gruaja, nëna dhe sidomos ajo shtëpiakja që përtej peshës së punëve në familje ( që janë të papaguara) dhe pamundësisë për të gjetur punë, do të vuaj dhe krizën e depresionit social , që ka mbytur tërë shoqërinë tonë. Ajo , gruaja , nga njëra anë duhet të përgatitet që mëmësia dhe të qenit amvisë këtë vit do ta ketë shumë të vështirë, pasi do përballet me krizën ekonomike , e cila do të ndjehet në tryezën e familjes dhe nga ana tjetër , vështirësitë për të ruajtur dhe menaxhuar situata e vështira , të cilat rrjedhin nga kriza ekonomike. Borxhi publik është 2.600 euro për çdo shqiptar. Kjo e bënë edhe më të vështirë jetesën, pasi do kthehet në mbijetesë dhe ajo që do ta ndjej më shumë ketë peshë është gruaja, sidomos ajo kryefamiljare dhe ato që jetojnë në sfidën e të përditshmes për të mbijetuar, duke dashur t’ua bëjnë jetën më të lehtë fëmijëve të tyre apo të moshuarve , për të cilat ato kujdesen me devocion dhe mirësi. Ky vit do të jetë i vështirë për ty nënë apo grua , se shpenzimet për argëtim dhe kulturë nuk kanë vend për familjet që shpërndajnë burimet e tyre të pakta financiare në sigurimin e gjerave bazike, sikurse është ushqimi dhe çatia mbi kokë. Ky vit do të jetë viti i trishtë ekonomik për familjet shqiptare e në veçanti për gruan dhe shpatullat e saj të brishta

Kryemadhi në SHBA, pritet nga Senatori i Michiganit Gary Peters

Kryetarja e LSI-së, Monika Kryemadhi, në vijim të takimeve në Shtetet e Bashkuara të Amerikës, ka takuar Senatorin e Michiganit Gary Peters.

Ata folën për sfidat e Shqipërisë, shtimin e bashkëpunimit dhe rritjen e vëmendjes së Senatit për Shqipërinë, por edhe për shqiptarët e Michiganit.

” Në vijim të vizitës në SHBA, u takova me Z. Gary Peters, Senator i Michiganit.

Në Michigan jeton një komunitet shumë i madh dhe i mirë integruar shqiptar

Z. Peters është edhe Co-Chair of “The Albanian Caucus” në Senat.

Në këtë takim bashkë me Z. Peters diskutuam për sfidat e Shqipërisë, shtimin e bashkëpunimit, duke marrë në konsideratë të dyja funksionet e tij, edhe për të rritur vëmendjen e Senatit amerikan përmes “Albanian Caucus”, por edhe me shqiptarët në zonën prej ku z.Peters është zgjedhur”, tha Kryemadhi me anë të një postimi.

Luan Rama: KiE rrëzoi 30 qershorin, të krijohet sa më parë Gjykata Kushtetuese

Deklarata për media e zëvendëskryetarit të Lëvizjes Socialiste për Integrim, Luan Rama

Mirëdita të gjithëve!

Në fakt, nga t’ia fillosh më parë morinë e problemeve të shumta që krijon qeverisja në këtë vend. Probleme, të cilat në thelb kanë të bëjnë jo thjesht dhe vetëm me imazhin e vendit, por mbi të gjitha kanë të bëjnë me standardet dhe cilësinë e demokracisë në vend.

Gjatë ditëve të fundit, në Shqipëri zhvillohet një vizitë e delegacionit të nivelit të lartë të autoriteteve lokale dhe rajonale të Këshillit të Europës, i cili pasi kontaktoi me funksionarët më të lartë të shtetit, pasi u njoh më nga afër me çfarë po ndodh në Shqipëri, ka mbajtur një qëndrim që është nga më të rëndët. Dhe në vazhdim të qëndrimeve të mbajtura më parë dhe nga OSBE, nga BE, nga KE e kështu me radhë.

Fjala është për zgjedhjet e 30 qershorit të vitit të kaluar. Për atë butafori të shëmtuar që në kundërshtim me Kushtetutën, në kundërshtim me ligjin krijoi një precedent të rrezikshëm për demokracinë dhe funksionimin e shtetit në Shqipëri.

Natyrisht të gjithë e dimë se çfarë ka ndodhur më 30 qershor, jo vetëm në procesin e paligjshëm të votimeve të komanduara, të realizuara dhe ato me 1001 probleme nga mazhoranca aktuale e krimit qeverisës, por dhe për shkak të zgjedhjes me emërim të një tufe banditësh dhe horrash të lidhur me krimin që janë imponuar në lidhje me krimin në mënyrë të paligjshme për të drejtuar në nivelin lokal.

Duke iu referuar këtij realiteti, Delegacioni i Autoriteteve Lokale dhe Rajonale të Këshillit të Europës në qëndrimin e tij zyrtar thekson përmes deklaratës së bërë nga z.Gunn Marit Gelgesen që është Presidenti i Dhomës ë Rajoneve të Kongresit se për fat të keq, citoj: Zgjedhjet lokale të vitit 2019 nuk ishin të favorshme për forcimin e demokracisë lokale në Shqipëri, por kanë çuar në më pak pluralizëm në bashki dhe në një erozion të më tejshëm të besim të qytetarëve në institucionet e vendit dhe më tej gjithashtu Presidenti i dhomës së rajoneve  të Kongresit të autoriteteve lokale dhe rajonale të Këshillit të Europës thekson se nuk ka demokraci funksionuese në nivelin e shtetit pa një demokraci pluraliste dhe të gjallë në nivelin lokal. Pra qëndrimi më i fundit evidenton, denoncon dhe nxjerrë edhe njëherë zbuluar maskaradën e zgjedhjeve të ashtu quajtura të 30 qershorit të vitit të kaluar dhe denoncon gjithashtu paturpësinë e veprimit të mazhorancës, e cila i kriminalizoi edhe këto zgjedhje siç ka bërë në fakt edhe me zgjedhjet e përgjithshme të vitit 2017. Çfarë ndodh konkretisht. Shqipëria do duhet të përmbushë detyrimet ndaj qytetarëve të vet, detyrimet ndaj vendit por edhe detyrimet ndaj partnerëve ndërkombëtarë në kuadër të çeljes të negociatave me Bashkimin Europian dhe më drejtë për drejtë akoma.

Shqipëria duhet të përmbushë detyrat e shtëpisë të përcaktuara në rezolutën e Bundestagut Gjerman si kusht për çeljen e negociatave me Bashkimin Europian. Prandaj mazhoranca në mënyrë të veçantë qeveria, duhet të heqë dorë nga bllokimi i qëllimshëm i Gjykatës Kushtetuese, duhet të heqë dorë nga përpjekjet për të kapur Gjykatën Kushtetuese duke kompromentuar në këtë mënyrë të gjithë Reformën në Drejtësi. Sepse në mënyrë të qëllimtë ka bllokuar Gjykatën Kushtetuese pikërisht për të krijuar terrenin e pandëshkueshme risë, terrenin e mos zbatimit të ligjit dhe terrenin e kriminalizmit të më tejshëm të jetës publike, politike në vend. Pse është e rëndësishme të zhbllokohet Gjykata Kushtetuese dhe të fillojë një orë e më parë nga puna sepse është kusht në radhë të parë për funksionimin normal Kushtetues të ligjit, për funksionimin normal Kushtetues të së drejtës në Shqipëri, por Gjykata kushtetuese është institucioni i vetëm që ka tagrin Kushtetues të interpretojë dhe të certifikojë aktet e institucioneve të tjera, në mënyrë të veçantë të Kuvendit.

Ndërkaq, Gjykata Kushtetuese ka dhe një detyrë të përcaktuar qartë edhe në rezolutën e Bundestagut gjerman sepse ajo duhet të shprehet për legjitimitetin e zgjedhjeve të 30 qershorit, prandaj mazhoranca, prandaj qeveria e ka bllokuar Gjykatën Kushtetuese për ti vazhduar dhe ti zgjasë sa më shumë jetën këtyre strukturave në krye të të cilëve i janë vënë element me background apo me prapavijë kriminale, prandaj apeli është të ç’ bllokohet Gjykata Kushtetuese dhe të filloj ajo menjëherë për të ndalur dorën e abuzivitetit dhe shpërdorimit, dorën e shkeljes së ligjit dhe Kushtetutës e zgjatur në mënyrë kriminale nga qeveria ndaj të gjitha institucioneve të tjera të cilat ajo përpiqet ti kapë, për ti përdorur pastaj në funksion të interesave të veta, që vetëm në funksion të qytetarëve shqiptar nuk janë dhe vetëm në interes të Shqipërisë nuk janë.

Raporti më i fundit, qëndrimi më i fundit i delegacionit të autoriteteve lokale dhe rajonale të Këshillit të Europës është dëshmia më e qartë e asaj maskarade që ka ndodhur në 30 qershor. Gjykata Kushtetuese duhet të kthejë Kushtetutshmërinë dhe legjitimitetin e zgjedhjeve në këtë vend si kushti i parë për të zgjidhur krizën politike, krizën qeverisëse, krizën parlamentare dhe mbi të gjitha krizën e besimit sepse siç thuhet edhe në qëndrimin më të fundit të këtij delegacioni, kjo sjellje e qeverisë ka çuar në një erozion të mëtejshëm të besimit të qytetarëve në institucionet e vendit. Faleminderit.