MONIKA KRYEMADHI: SHKARKIMI I PALIGJSHËM I KRYEPROKURORIT TË KRIMEVE TË RËNDA ËSHTË RASTI ME FLAGRANT I EDI RAMËS DHE VEGLËS SË TIJ NË PROKURORINË E PËRGJITHSHME

Kryetarja e Lëvizjes Socialiste për Integrim, Monika Kryemadhi me anë të një postimi ka reaguar në lidhje me shkakrimin nga kreu i Prokurorisë së Krimeve të Rënda, Besim Hajdarmataj.

Kryemadhi ka thënë se largimi i tij nga detyra është një përppjekje e qartë për të mbyllur përfundimisht çështjen Tahiri, ndërkohë që ka shtuar se emërimi dhe shkarkimi i drejtuesit të Prokurorisë së Krimeve të Rënda nuk është kompetencë e Arta Markut.

Sakaq, Kryemadhi ka shtuar se ky akt i paprecedent rëndon mbi kryeprokuroren Marku, e cila sipas saj nuk e ka kaluar procesin e Vettingut.

REAGIMI I PLOTË:

Shkarkimi i paligjshëm i Kryeprokurorit të Krimeve të Rënda është rasti me flagrant i Edi Ramës dhe veglës së tij në Prokurorinë e Përgjithshme!

Besim Hajdarmataj ishte prokurori që nisi të hetojë për çështjen Tahiri, kërkoi dhe argumentoi ndalimin e tij me akuza të qarta dhe të bazuara, por që u hodhën poshtë nga deputetët e PS.

Largimi i tij nga detyra është qartas përpjekje për të mbyllur përfundimisht çështjen Tahiri, e cila mban peng jo vetëm Edi Ramën, por të gjithë qeverinë.

Emërimi dhe shkarkimi i drejtuesit të Prokurorisë së Krimeve të Rënda nuk është kompetencë e Arta Markut!

Por kjo nuk e ka penguar atë dhe shefat e saj në qeveri të ndërmarrin këtë veprim të paligjshëm, në kohën kur të gjithë prisnin që çështja Tahiri të shkonte deri në fund.

Edi Rama, i frikësuari i madh i drejtësisë bërtet lart e poshtë për Vettingun ndaj gjyqtarëve dhe prokurorëve, por ndërkohë largon nga detyra Kryeprokurorin e Krimeve të Rënda pa pritur që ai të vetohet.

Ky akt i paprecedent rëndon mbi Prokuroren e Përgjithshme, e cila vetë nuk ka kaluar në procesin e Vettingut, rëndon mbi të gjithë ata që paturpësisht vijojnë të shkërmoqin dosjet e krimit dhe korrupsionit.

Edi Rama duhet ta ketë të qartë që asnjë presion apo largim i paligjshëm nuk e shpëton atë dhe bashkëpunëtorë e tij nga dosjet e krimit dhe korrupsionit. Për ato dosje ai dhe bashkëpunëtorët e tij do të përgjigjen para drejtësisë një më një!

LSI paralajmëron qartas Prokuroren e Përgjithshme dhe të gjithë strukturat përgjegjëse; Të mos guxojnë të hedhin hapa për të fshehur gjurmët e krimit!

Çdo akt i tillë i paligjshëm, që nga ekstradimi i Naser Seitajt dhe deri te ky i sotmi, është përgjegjësi e pastër penale e atyre që kanë firmosur urdhrat e kryeministrit.

/ In News / By Elisa Piperi / Comments Off on MONIKA KRYEMADHI: SHKARKIMI I PALIGJSHËM I KRYEPROKURORIT TË KRIMEVE TË RËNDA ËSHTË RASTI ME FLAGRANT I EDI RAMËS DHE VEGLËS SË TIJ NË PROKURORINË E PËRGJITHSHME